मुख्य समाचार

छात्रालाई होटलमा पुर्याएर परीक्षा लिने पोखराका शिक्षक जेल चलान

छात्रालाई होटलमा पुर्याएर परीक्षा लिने पोखराका शिक्षक जेल चलान

पोखरा : विद्यार्थीलाई होटलमा लगेर परीक्षा लिएको अभियोगमा राष्ट्रिय उच्च मावि टुँडिखेलका शिक्षक पुर्पक्षका लागि जेल चलान भएका छन्।

जिल्ला अदालत कास्कीको आदेशमा शिक्षक शिरिषकुमार बस्ताकोटी बिहीबार जेल चलान भएका हुन्। परीक्षा अमर्यादित बनाएको आरोप लागेका अन्य ३ जना भने धरौटीमा छुटेका छन्।

कक्षा ११ की छात्रालाई ऐच्छिक अंग्रेजी विषयको परीक्षा लिन शिक्षक बस्ताकोटीले मंसिर १२ गते रुपाताल किनारको एक होटलमा पुर्याएका थिए।

परीक्षा होटलको कोठामा लिई बियर मासुसमेत खाएर छात्रामाथि जबर-जस्तीको प्रयास समेत गरेको आरोप शिक्षक बस्ताकोटीलाई थियो। उक्त मुद्दामा जिल्ला न्यायाधीश श्रीकृष्ण भट्टराईको इजलासले बस्ताकोटाीलाई थप अनुसन्धानका लागि कारागारमा राख्ने आदेश गरेको अदालतका सूचना अधिकारी नील पनेरुले जानकारी दिए।

मौका परीक्षा विद्यालयले विद्यालयमै लिनुपर्नेमा शिक्षकले मोटरसाइकलमा राखी छात्रालाई होटल पुर्‍याएका थिए। उक्त घटना २ महिनापछि सार्वजनिक भएको थियो।

शिक्षक बस्ताकोटीले अदालती बयानमा आफूमाथिको आरोप झुठो भएको बयान दिएका थिए। बस्ताकोटीले विद्यालयका शिक्षक एवं सहायक केन्द्राध्यक्ष घनश्याम रेग्मीले ती छात्रालाई जसरी पनि पास गराइदिनुपर्ने भन्दै रेस्टुरेन्टमा लगेर परीक्षा दिने वातावरण बनाउन अह्राएको पनि उनको बयान थियो।

उक्त परीक्षा अमर्यादित बनाएको आरोप विद्यालयका प्रअ सूर्य तिवारी, शिक्षक घनश्याम रेग्मी र विद्यार्थीलाई समेत थियो। अदालतले परीक्षा अमर्यादित बनाएको अभियोगको मुद्दामा शिक्षक बस्ताकोटी र सहायक केन्द्राध्यक्ष रेग्मीसँग जनही ७५/७५ हजार, प्रअ तिवारीसँग ५० हजार, विद्यार्थीसँग ५० हजार धरौटी मागेको थियो।

तस्बिर- गण्डकी छड्के

प्रतिक्रिया दिनुहोस
Pokhara-7, Masbar, Kaski Nepal
सुचना बिभाग दर्ता: १६६३/०७६/७७