समाचार

नेपाली बाेल्न नजान्ने नेपाली हिराेइन

नेपाली बाेल्न नजान्ने नेपाली हिराेइन

सबैलाई सजिलो लाग्ने भाषा हो राष्ट्रभाषा । हामी सजिलै आफ्नो मातृभाषा नेपाली बोल्न सक्छौँ । २०६८ सालको जनगणनाअनुसार नेपालमा नेपाली भाषा पछि मैथिली, भोजपुरी, तामाङ, हिन्दी र अंग्रेजी पनि धेरै बोलिने भाषा हो । भाषा सञ्चारको एक माध्यम भएकोले ठाउँ अनुसारको भाषा बोल्न र बुझ्नु जरुरी पनि हुन्छ ।

भाषाकै विषयमा लिएर संसारमा ठूलठूला विवाद, बहस र संघर्षहरु हुने गरेका छन् । किनकी भाषासँगै पहिचान र अस्तित्वको विषय जोडिएर आएको हुन्छ । नेपालका केही अभिनेत्रीहरुलाई राष्ट्रभाषा नेपाली पनि राम्ररी बोल्न आउँदैन । नेपाली भाषा राम्रोसँग बोल्न नजान्ने र नेपाली भाषा सिक्न कक्षा नै लिएका केही अभिनेत्रीहरु

आन्ना शर्मा

सिनेमा जेरीबाट डेब्यु गरेकी अभिनेत्री आन्ना शर्मा अहिले दोस्रो सिनेमा ‘ग्याङस्टार ब्लुज’को सुटिङमा व्यस्त छिन् । आनालाई पनि राम्रोसँग नेपाली बोल्न आउँदैन । उनी सिनेमामा बाहेक बाहिर राम्रोसँग नेपाली बोल्न सक्दिनन् । अन्र्तवार्ताहरुमा पनि उनलाई नेपाली बोल्न कठिन भएको हुन्छ । यहि कारण उनी धेरैजसो नेपाली बोल्ने प्रयास गर्दागर्दै अंग्रेजीमा कुराकानी गर्ने गर्छिन् । आधा नेपाली आधा अंग्रेजी उनको बोलीचालीको भाषा हो । उनलाई नेपाली भएर नेपाली भाषा बोल्न नजान्ने भनेर धेरैले आलोचना समेत गर्ने गरेका छन् ।

साम्राज्ञी राज्यलक्ष्मी

एक समय साम्राज्ञीलाई पनि नेपाली भाषाले खुबै सतायो । सानैदेखि भारतमा बसेर पढेका कारण उनलाई नपाली भाषा अप्ठ्यारो भयो । उनी तीन कक्षासम्म चितवनमा पढेपछि नयाँ दिल्लीको ‘साईबाबा गल्र्स’ स्कुलमा भर्ना भइन् । उनले त्यहाँ तीन वर्ष बिताइन् । कक्षा ६ मा उनी काठमाडौंको ‘रोयल एकेडेमि अफ ईन्डिया’मा भर्ना भइन् ।

उनले पढेका तीनवटै ठाउँमा हिन्दी भाषीहरुको बाहुल्यता भएका कारण नेपाली बोल्ने मौका मिलेन । उनले दिल्लीबाट काठमाडौं फर्कँदा त नेपाली भाषा झण्डै बिर्सेकी थिईन् । नेपाली बोल्न गाह्रो भएपछि उनलाई उनकी आमाले नेपालीको ट्युशन कक्षा हालिदिएकी थिईन् । नेपाली भाषा सिक्ने क्रममा उनलाई शिक्षकहरुले नेपाली बोलेर खाँदैनस् सम्म पनि भनेका थिए रे । तर अहिले भने उनलाई नेपाली बोल्न खासै गाह्रो छैन । समयसँगै उनको नेपाली भाषा पनि सुधार हुँदै आएको छ ।

सृष्टी श्रेष्ठ

अभिनेत्री तथा पूर्व मिस नेपाल सृष्टी श्रेष्ठलाई पनि शुद्ध नेपाली बोल्न निकै मेहनत गर्नु पर्छ । सिनेमामा सम्वादहरु घोकेर भएपनि शुद्ध नेपाली बोल्ने उनी अफस्क्रिन कुराकानीमा भने प्राय अंग्रेजीकै प्रयोग गर्छिन् । उनी कुराकानीका क्रममा नेपाली बोल्ने प्रयास गर्छिन् तर उनको नेपालीमा अधिकतम अंग्रेजी मिसिन्छ । लामो समय लण्डनमा बसेका कारण उनलाई नेपाली बोल्न कठिन भएको बुझिन्छ ।

मेनुका प्रधान

अभिनेत्री मेनुका प्रधानको जन्म भारतको मनिपूरमा भएको थियो । उनी पाँच वर्ष भारतमा बसेर नेपाल (नवलपरासी) आईन् । मेनुकाका बुवा भारतीय सेनामा कार्यरत भएका कारण उनी उतै जन्मिईन् र पाँच वर्ष बिताईन् । बोल्न जान्ने भए देखि हिन्दी बोल्न थालेकी मेनुकालाई पनि नेपाल आएपछि नेपाली बोल्न साह्रै गाह्रो भएको थियो । उनले नेपाली बोल्न नजानेका कारण नेपाली भाषाको कक्षा नै लिएकी थिईन् ।

मेनुकाकी आमा मनिपूरकी थिईन् । उनलाई पनि राम्रोसँग नेपाली बोल्न नआउने भएका कारण मेनुकालाई नेपाली भाषा सिक्न कठिन भयो । अहिले भने मेनुका नेपाली राम्रोसँग बोल्न सक्छिन् । विशेष गरी कलाकारिताबाटै विश्वमा देशको संस्कार र संस्कृति झल्काउने र भाषालाई प्रवद्र्धन गर्ने भएकाले कलाकारहरुको राष्ट्रभाषा प्रतिको प्रेम हुन अझ जरुरी छ ।

विदेशी भाषा बोल्नु आफैमा अपराध होइन तर आफ्नो भाषा विगार्नु चाँही अपराध भन्दा कम पनि होइन । विविध कारणले नेपाली भाषा बोल्न नजाने पनि जोकोहीले आफ्नो भाषिक क्षमता सुधार्नुको विकल्प छैन । जानीजानी अङ्ग्रेजी वा विदेशी भाषा प्रयोग गरेर आफूलाई विशिष्ट बनाउन खोज्नु एउटा कलाकारको लागि शोभनीय हुँदैन ।

साहारा कार्की

चैत २७ गते रिलिज हुने तयारीमा रहेको सिनेमा ‘दर्पण छायाँ–२’ की मुख्य अभिनेत्री साहारा कार्की यतिबेला अमेरिकामा छिन् । सानै उमेरदेखि अमेरिकामा बस्दै आएकी उनी आमाबुवाले निर्माण गरेको सिनेमा ‘दर्पणछायाँ–२’ को काम सकाएर अमेरिका फर्केकी हुन् ।

नेपाली भएर पनि सानै देखि अमेरिकामा बस्दै आएका कारण साहारालाई आफ्नै राष्ट्रभाषा चुनौतीपूर्ण बनेको छ । उनी राम्रोसँग नेपाली बोल्न सक्दिनन् । केही समय अघि उनले सिनेमा प्रमोशनको क्रममा आफूलाई नेपाली भाषाले साह्रै दुःख दिएको बताएकी थिइन् । तर उनले सिनेमामा भने सम्वादहरु घोकेरै भएपनि सकेसम्म शुद्ध बोल्ने प्रयास गरेकी छिन् ।

प्रतिक्रिया दिनुहोस
Pokhara-7, Masbar, Kaski Nepal
सुचना बिभाग दर्ता: १६६३/०७६/७७